Галіна Загурская

Об авторе

Ад работ мастачкі Галіны Загурскай ідзе цёплая і светлая энергетыка. Пейзажы, партрэты, нацюрморты, сюжэтныя карціны мовай фарбаў перадаюць тыя імгненні радасці, захаплення, настрою, якія натхняюць мастачку. “Танец птаха”, “У люстэрку Дзвіны”, “Маленні светлай Еўфрасінні”, “Кацяня” – гэтыя і іншыя яе работы заварожваюць, ад іх святлее на душы, кожны знаходзіць у іх штосьці сваё, асабістае і важнае.
Яе работы неаднаразова дэманстраваліся ва ўстановах культуры і адукацыі Полацка, Наваполацка, Віцебска. Яна брала ўдзел у выставах абласнога, рэспубліканскага і міжнароднага ўзроўню. Прыйшло прызнанне: яна была адзначана дыпломам нацыянальнай выставы наіўнага мастацтва “Інсіта-2012”, прысвечанай 125-годдзю з дня нараджэння Марка Шагала, і дыпломам нацыянальнай выставы “Інсіта-2016”, прысвечанай 120-годдзю Алены Кіш. А работа палачанкі “Маленні светлай Еўфрасінні” была адабрана для ўдзелу ў V Маскоўскім міжнародным фестывалі ”Фэст-наіў-2016”.
У мінулым годзе мастачка брала ўдзел у абласных і рэспубліканскіх выставах-конкурсах, адзначана дыпломам за ўдзел у пленэры па маляванцы, які прайшоў у г. Глыбокае. Работы Галіны Загурскай з 2019 года ўнесены ў спісы гісторыка-культурнай спадчыны Рэспублікі Беларусь у вобласці інсітнага(наіўнага) жывапісу.